Esti ciclu, que quier tener continuidá, busca visibilizar la producción audiovisual n’asturianu y normalizar la presencia n’espacios de cultura estables
Tiempo de lectura: 3 minutos
Cines Embajadores Foncalada pon en marcha esti mes de xunetu’l primer ciclu de cine n’Uviéu «col compromisu d’averar el cine a la llingua asturiana y fomentar el so usu en nuevos contestos culturales y públicos»
Esti ciclu, «que quier tener continuidá, busca visibilizar la producción audiovisual n’asturianu y normalizar la presencia n’espacios de cultura estables». Na primer sesión tamién van participar dellos miembros de Verbéu, que van presentar el ciclu.
Dende los Cines informen que «la entrada van ser 3,5 €, siguiendo col nuestru oxetivu de facilitar l’accesu a películes de calidá y de puxar por nueves formes de vincular el cine cola cultura asturiana».
Pal desarrollu del proyeutu, continúen, «contemos cola collaboración de Verbéu, Asociación de Traductores Profesionales n’Asturianu, colos que trabayemos nos procesos de sotituláu, asesoramientu llingüísticu y espardimientu. Verbéu ye una organización ensin fines d’arriquecimientu que llucha pola dignificación de la traducción profesional al asturianu y promueve’l so usu nos ámbitos profesionales, culturales y sociales».
«Con esti ciclu, reafirmamos el nuestru compromisu cola diversidá llingüística, l’accesu a la cultura y la creación d’espacios d’exhibición pa que’l cine pueda sentise y lleese n’asturianu», destaquen.
Les películes confirmaes son:
Llunes 30 de xunu 19:45 – All We Imagine as Nigh:t En Mumbai, la rutina de la enfermera Prabha vese alteriada cuando recibe un regalu inesperáu del home, que trabaya n’Alemaña. La compañera de pisu, Anu, más moza, intenta en baldre alcontrar na ciudá un sitiu pa poder trebeyar col mozu. Al final, un viaxe a una ciudá con costa permíte-yos atopar un espaciu pa que los deseos de les dos se manifiesten.
Llunes 7 de xunetu 19:45 – Fallen Leaves: Ansa ta soltera y vive en Helsinki. Trabaya con un contratu de cero hores nel supermercáu, reponiendo los estantes, pa dempués clasificar el plásticu reciclable. Una nueche conoz de casualidá a Holappa, un trabayador igual de solu, pero alcohólicu. Magar lo esperable y tolos malentendíos, intenten construir una rellación. Como resultáu, Holappa consigue controlar l’adicción que tien al alcohol.
Llunes 14 de xunetu 19:45 – En fanfare: Thibaut ye un director d’orquesta de renome internacional que viaxa pel mundu. Al enterase de que ye adoptáu, descubre que tien un hermanu, Jimmy, un emplegáu d’un comedor d’escuela que toca’l trombón nuna banda de música nel norte de Francia. Paez que nun tienen nada en común, quitando l’amor pola música. Al conocer les habilidaes musicales esceicionales que tien l’hermanu, Thibaut propónse cambiar el rumbu inxustu del destín. Ye entós cuando Jimmy entama a suañar con otra vida…
Llunes 21 de xunetu 19:45 – The Substance ‘Tu, pero meyor en tolos sentíos’. Esta ye la promesa, un productu revolucionariu basáu na división celular, que crea un alter ego más mozu, más guapu, más perfectu. Tentada pola oportunidá, Elisabeth Sparkle, una celebridá en decadencia, toma esti sueru del mercáu negru faciendo una versión remocicada de sí mesma, Sue, con efectos tan inesperaos como espantosos.
