Na rexón, la pesca l’angula remóntase a un sieglu atrás y, dende entós, apenes camudó la forma na que se captura l’alevín de la anguila. El cedazu, una especie de criba xunida a un mangu, ye l’únicu arte de pesca autorizau y sigue emplegándose tantu a pie como en llancha. La captura dende embarcaciones, sicasí, namás ta permitida na desaguadura del ríu Nalón. 

Magar el Nalón y el Sella concentraron tradicionalmente les captures, los alevinos pueden internase en cualesquier cauce, rumbu a la so metamorfosis n’anguiles. Como «ríos anguleros» tán consideraos tamién l’Eo, Porcía, Navia, Negru, Esva, Piles, España, la ría de Villaviciosa, Llibardón, Espasa, Bedón, Purón y Deva. 

Ribeseya y San Xuan de l’Arena, nes desaguadures del Sella y el Nalón respeutivamente, son los cientros neurálxicos de l’angula n’Asturies. Ellí, la llegada de ‘l’oru blancu’ vívese intensamente: ente los nervios que siempres acompañen un primer día, la esperanza d’alquirir un ingresu estra y la deceición cuando l’angula nun apaez. Tamién con preocupación pel futuru de la pesquería, con captures a la baxa y ca vegada menos xornaes de pesca autorizaes. 

A la metá la medianueche, na sablera ribeseyana de Santa Marina, los anguleros entamen los preparativos. Son toos ellos profesionales, yá que na rexón la pesca deportiva d’angula ta prohibía dende l’añu 2000. Ye la primer nueche de campaña, el momentu del reencuentru. Van poniéndose al día, compartiendo impresiones y tomando les primeres decisiones. Dalgunos, viendo la bonanza de la mar, opten por treslladase a la sablera de San Antolín, en Llanes, onde desagua’l ríu Bedón y onde, nes últimes campañes, detecten una mayor presencia d’angula. 

En Ribeseya deciden quedase siete anguleros. Una vegada n’agua, entama la faena. Na desaguadura del Sella la pesca de l’angula faise namás a pie, con cedazos de rompiente. Ca profesional, provistu d’esa ferramienta y cola única lluz que proporcionen los frontales, va cribando l’agua. 

La llabor requier técnica, pero tamién d’una paciencia infinita. Más nos últimos años, cuando la escasez d’angula ye yá tan evidente que pa consiguir un solu exemplar tienen de repetir la operación una y otra vegada. 

«Has de procurar que l’agua siempres presione, tantu si pesques a la baxada de la ola como a la subida. Nel momentu que dexes de presionar, escapen. Cuando para de presionar la ola, tienes que alzar [el cedazu]. Yá lo faes por instintu», esplica Álvaro Santos, anguleru dende va trenta años. 

«Si la mar ta muy bella», sigue, «tienes que tener más cuidau porque entren y sálente. Si hai muncha marexada aguantes un poquitín y alces y métetelo la mesma ola nel cedazu, ye simplemente aguantar. Hai que tener paciencia y que te preste. Normalmente los que venimo somos xente que llevamos munchos años. La xente de fechu foi desapaeciendo cuandu entamó a haber menos angula y precisabes munches hores pa pescar daqué». «Mira otra». Álvaro interrumpe la so esplicación. Cayó una angula, una sola. «Qué grande y guapa», celébren-y los compañeros. 

Naide vive yá de l’angula, una actividá que realmente foi siempre un complementu a la economía familiar. «Pa vivir d’ello nun ye, pero polo menos ayuda. Les angules son un estra», apunta José Manuel Gutiérrez, anguleru que con esta suma 54 temporaes n’activu. Ye amás secretariu de la Cofradía de Pescadores Virxe de Guía de Ribeseya, onde se concentra’l gruesu de ventes de la fastera oriental. N’él recae dende 1988 la responsabilidá de la puya del primer ‘oru blancu’ de la campaña, una llabor que esti añu desempeñó per última vegada, pos llegó-y el momentu de la xubilación. Tampocu la prósima campaña tornará a l’angula. 

Les angules son seres llucífugos (huyen de la lluz), polo qu’aprovechen les marees subientes de la nueche pa entrar nos ríos. Les meyores xornaes pa la pesca son, por tantu, aquelles que coinciden col novilluniu (fase na que la Lluna nun ye visible dende la Tierra). Eses nueches conócense na xerga de los anguleros como ‘oscurada’. 

Factores que tamién favorecen la entrada d’angules son les agües turbies poles lluvies, los temporales marítimos que removen los fondos y los caudales elevaos. Na primer y segunda nueche nun se cumple nengunu d’ellos, lo que fae que les captures se desplomen. Na primer puya, na rula de Ribeseya aportaron 3.670 gramos. Na de San Xuan de la Arena, pocu más de mediu kilu. 

«L’angula depende del tiempu, tien que revolvese. Ye duru tar toa la nueche metíu n’agua, pero val más que llueva y faiga aire y polo menos pesques daqué; que nun tea como agora, que nun falta más que venir en bañador», apunta José Ramón Pintado, que encadena 22 campañes d’anguleru. Solu fizo un paru, cuenta, el tiempu que trabayó de camareru. 

Güei, una bona nueche de trabayu pue saldase con un kilu por anguleru. Nada que ver coles cantidaes d’antañu, cuando l’angula yera tan bayurosa que «el so escedente utilizábase pa cebar a los gochos». «Tuve nueches de pescar ochenta. Agora si na temporada garres 30 o 35 kilos…», apunta Gutiérrez. 

N’aquellos tiempos d’abondanza  l’angula nin yera un bien de lluxu nin algamaba los precios d’estos últimos años. Na rentabilidá ta la respuesta a por qué sigue compensando pasar les nueches dientro l’agua pa capturar apenes un puñáu d’angules. En 2023, el preciu mediu por kilu foi de 502,91 euros. Nenguna otra especie de les comercializaes nes rules asturianes algama tal cuantía. La siguiente más alta ye’l santiaguín, con una media de 87,15 euros por kilu, según los datos de la Direición Xeneral de Pesca Marítima. 

Na primer puya de la temporada, la cifra ye entá más desorbitada. Esti vienres 1 de payares, en San Xuan de l’Arena batiose’l récor hestóricu d’Asturies, con 12.000 euros el kilu. L’anterior máximu habíase algamau un añu enantes en Ribeseya, con 8.135 euros el kilu. 

L’angula ye una de les poques especies nes que ta permitía la pesca d’alevinos. Dende los años ochenta, esperimentó una mengua del 95% y ta incluyía comu especie en «peligru críticu d’estinción» na ‘Lista Roja’ de la UICN (International Union for Conservation of Nature’s). 

Qu’hai menos angula ye un fechu que lleven alvirtiendo dende va tiempu los propios anguleros. Son, dicen, los más interesaos en saber qué ta pasando y, por ello, nes últimes campañes dalgunos solicitaron análisis nel Sella. La contaminación ye ún de los fautores que señalen, especialmente nun ríu con «actividaes n’escesu, depuradores…». Nun llugar tan pequeñu, onde tanta xente se conoz, nun ye fácil señalar. 

«La pesca ye un factor mínimu. Más agora que pescamos trenta díes, antes yeren siete meses», considera Álvaro Santos. «Ye’l tiempu, les corrientes… ¿Por qué hai tantísimes en Francia y equí non? Nun creo que les angules sían franceses», ironiza José Manuel Gutiérrez. 

Nun son namás los asturianos, tamién los anguleros del restu del Cantábricu miren al casu francés. «Equí nun se repobló, en Francia llevan venti años y paez que funciona», indica Álvaro Santos. Pa esta temporada 2024/2025, el Ministeriu d’Agricultura del país galu fixa que «al menos el 60%» de les angules capturaes han d’ufiertase pa la repoblación. D’una «cuota total de 65 toneláes», la cantidá destinada a repoblar ye de 39 toneláes. El restu, 26 toneláes, resérvase pal consumu. 

L’escasez d’angula nun ye un fenómenu esclusivu d’España. La mengua de la especie, que los espertos asitien nel 95%, ye a nivel global. Según la Unión Europea, la situación «crítica» na que s’atopa l’anguila europea o anguila común (Anguilla anguilla) débese «principalmente a actividaes humanes». 

La Comisión Europea apunta concretamente a tres factores: la pesca, la contaminación y les barreres que dificulten les migraciones, como les preses. Amás, sumen como «causes potenciales» los «parásitos y cambeos nel cursu de la Corriente del Golfu». Tamién «la pesca furtiva y l’esportación illegal d’anguiles a Asia son cuestiones adicionales apremiantes». 

El mercáu negru ye, dafechu, un de los grandes problemes. En 2023, la Guardia Civil detuvo a trenta persones n’España dientru de la operación Askea IV-Lake, desendolcada baxo la coordinación d’Europol. N’esta actuación, una de les mayores fasta la fecha, desarticularon tres organizaciones criminales asitiaes n’Asturies y San Sebastián y incautaron 18 toneláes, «cuyu valor nel mercáu negru podría ser superior a los 20 millones d’euros».

«Debíu a los grandes beneficios económicos que conlleva, pudiendo algamar fasta los 9.000 euros por kilu, deteutóse la so esportación ilícita a países del sudeste asiáticu al traviés de l’unvíu d’angules nel equipaxe personal, emplegando maletes acondicionaes pa’l so tresporte con bolses inyectaes con osíxenu, pa garantizar la so supervivencia fasta 42 hores», apuntaba entós la Guardia Civil. 

Atoparen amás «empreses pantalla constituyíes espresamente pa l’esportación d’angula a Asia, que camuflaben les esportaciones ente otros productos refrixeraos».

Lo mesmu qu’en munches otres actividaes del seutor primariu, la pesca d’angula y la so regulación trescienden el nivel rexonal y nacional. Son cuestiones de dimensión europea. Según la Unión Europea, los «Estaos Miembros deberíen asumir el lideralgu creando planes de xestión que tengan en cuenta les condiciones rexonales y llocales». 

N’Asturies, esisten esos planes de xestión pa les distintes zones costeres y una regulación pa cada campaña, ellaborada «teniendo en cuenta» los reglamentos europeos, según recueye la resolución de la Conseyería de Mediu Rural y Política Agraria, d’esta mesma selmana. 

L’oxetivu de meyorar la conservación de la especie marcáu pola Unión Europea tradúcese na práutica nun amenorgamientu de los díes de captura. La última temporada los díes hábiles fueren trenta, el mínimu hestóricu. Nesta campaña 2024/2025 repítese esi mesmu númberu, coles xornaes repartíes al rodiu de les feches de les oscuraes, dende payares fasta febreru. 

Nesti entamu de campaña, los anguleros de l’oriente tienen permisu pa trabayar los díes 1 y 2 de payares y, nel restu d’Asturies, tamién el día 3. Pa tornar a capturar angula tendrán qu’esperar al 27 de payares. Antañu, les temporaes entamaben yá n’ochobre y llegaben a estendese hasta abril. 

Tamién el númberu de llicencies ta llendáu: un máximu de 46 nel plan de xestión de l’Oriente, 20 nel de la ría de Tinamayor y 48 nel correspondiente a la ría del Nalón. 

Qué escenariu-y espera a la pesquería ye l’incertidume cola que conviven agora los anguleros. «¿El futuru, futuru? Véolu bien fodíu, tenemos a los ecoloxistes a la contra», espresa José Ramón Pintado. Lo qu’esos seutores conservacionistes reclamen pa l’angula ye la veda. «Un paru biolóxicu que vede la pesca de l’angula ensin falta», volvía reclamar concretamente la Coordinadora Ecoloxista d’Asturies esta pasada selmana. «Nun tien nengún fundamentu nin sentíu que tea permitía la pesca profesional de l’angula, tando vedada la de l’anguila», sostienen dende la entidá. 

«El futuru nun depende de mí, depende de lo que faigan. Si faen dalgo pola angula que nun sían prohibiciones y más prohibiciones… Lo que tienen que cuidar ye’l ríu», opina l’anguleru Álvaro Santos. Pa José Manuel Gutiérrez, el futuru ta nes manes «de los políticos»: «Creo que va siguir pescandose, ¿quién va quitar a los franceses de pescar? Los franceses nun son los españoles. L’añu pasáu pescaren sesenta toneláes d’angula, ¿van quitálo? Nin la Comunidá [Europea] nin María Santísima. Y gracies a ellos pescamos nós».