Esiste una Declaración Universal de los Derechos del Animal y, pa espardela, Enrique Carballeira convirtióla nun llibru ilustráu. El so fin ye divulgar y ayudar a una protectora a cubrir los sos gastos.
Tiempo de lectura: 4 minutos
«Toa actuación que suponga la muerte d’un gran númberu d’animales salvaxes ye un xenocidiu».
Cuando’l periodista, escritor ya illustrador Enrique Carballeira vió esi artículu de la Declaración Universal de los Drechos de l’Animal, pensó que podía tratase d’un «fallu de traducción». Entós, acudió a la versión n’inglés de l’artículu y la mesma referencia al «xenocidiu» repítese. «Ye asina», esplica.
Esi artículu, que tantu llama l’atención por aplicar a los animales un conceutu reserváu pal «esterminiu o eliminación sistemática d’un grupu humanu», ye ún de los catorce incluyíos na Declaración de 1978. Casi mediu sieglu dempués de la so redacción, Enrique Carballeira creó la primera versión illustrada. Y fízolo con fines solidarios y educativos. Lo que se recaude cola venta de ‘Vivo y siento: los animales tamién tienen derechos’ va destinase a la protectora Animales de Oriente. Lo que cuenta al traviés de la imaxe, ye trabayar dende la infancia’l respetu polos animales.
«Los artículos son toos bastante lóxicos. Son unos mínimos bien básicos que yá dexen claru cómo debiera ser la rellación y el tratu a los animales», esplica l’autor, tamién periodista d’Onda Cero. Enrique Carballeira comunica cola voz, cola palabra, cola illustración y tamién cola conciencia. Sabe que «lo ideal sería que se cumplieren, pero nin siquiera se cumplen los Derechos Humanos». «Que se sepa que la Declaración Universal de los Drechos de l’Animal esiste y que los más pequeños, que ye per onde se tien d’entamar, tenganla presente» ye la so aspiración.
L’articuláu de la Declaración ye claru y direutu. Pero non asina la so hestoria y los sofitos recibíos. El documentu foi impulsáu pola Lliga Internacional de los Drechos del Animal, constituyida en 1976 en Xinebra. El 26 de xineru de 1978, el testu foi presentáu na Universidá de Bruseles y el 15 d’ochobre d’esi mesmu añu na Casa de la UNESCO en París. Sicasí, la UNESCO (Organización de les Naciones Xuníes pa la Educación, la Ciencia y la Cultura) nun la llegó nunca a adoptar formalmente.
Colos años, los derechos que recueye la Declaración sí foron incorporándose a les llexislaciones nacionales. N’España, la última -y polémica- ye la Llei de Bienestar Animal, en vigor dende l’añu pasáu.
«Afortunadamente va viéndose una concienciación mayor de la sociedá», considera Carballeira. Queda, aún asina, camín per andar y «el principal problema ta nos mayores».
A los adultos diríxese tamién la versión illustrada de la Declaración, porque «la imaxe siempres aporta daqué más». Permite tamién concretar, y asina lo fizo l’autor, que decidió representar al toreru y al cazador magar nun apaecen mencionaos nel documentu orixinal. «El tema de los toros paéceme lo más grave y lo más duru. A la tauromaquia nun-y atopu xustificación», comparte.
Lo contrario a lo que promulga esa Declaración de drechos de los animales, como l’abandonu -que apaez contempláu como «un actu cruel y degradante»- sigue viéndose, por desgracia, nes protectores. A una d’eses entidaes, Animales de Oriente, con sede en Piloña y cola que Carballeira collabora dende hai tiempu, tan destinaos los beneficios de la venta de llibros. Una ayuda pa cubrir unos «gastos que son bestiales», recuerda Carballeira, quien rescampla que faen una «llabor que debería ser pública».
«Ye importante que la xente collaborare na midía lo posible. Como sociu, mercando piensu o faciendo de voluntariu pa, simplememente, sacar a pasear a los perros», indica l’autor.
Cola primer edición agotada, la opción d’ayudar al traviés de la compra de llibros va tar disponible otra vuelta de cara a la Navidá, cuando ta prevista una segunda tirada. Na so meta d’esparder los drechos de los animales, Carballeira trabaya amás n’otra idea: una versión audiovisual pa compartir al traviés de redes sociales.
