En 2023 abandonáronse cerca de 200.000 perros n’España. La protectora Animales de Oriente ye una de les munches asociaciones animalistes que llucha escontra esa vergoñosa llaceria
Tiempo de lectura: 8 minutos
Son les once de la mañana d’un vienres del mes de xunetu y equí fuera llueve fuerte; tantu que paez seronda y el día, gris y fríu, namás convida a quedase en casa, a abellugase, a saboriar un café caliente… Sicasí, y a pesar de que son hores del so tiempu llibre, Mari y Carlos yá lleven trabayando un bon cachu: afánense dando vueltes y repartiendo’l desayunu a lo llargu y anchu d’un recintu nel que –agora mesmu– conviven más de venti perros.
La so xera (veloz, decidía y engalanada con una gran sorrisa) vese arrodiada d’una mecigaya de lladríos nerviosos que resuenen ensin cesar, allegres y ansiosos por recibir una de les sos dosis diaries de ciñu y atenciones.
Un pocu más allá (nuna caseta d’obra atestada de sacos de piensu,llates de paté, medicines y mantes) Pedro toma un breve descansu mientres fuma, mirando la cai: al llau suyu, echada, una mastina enorme de 70 kilos (Bella) acompáñalu, zarrando los güeyos con gustu al contautu de les afalagadures distrayíes que-y da ente reflexona (otra vegada más) sobre’l llabor que faen: «Ye duru, bien duru –diz ensin dexar de mirar p’afuera– pero tamién ye enormemente satisfactoriu: l’amistá d’un perru ye daqué que camudate per dientro», afirma.
Nun fala por falar: él, ensin dulda, yá nun ye’l mesmu que cuando entamó nesto, va munchos, munchos años. Peles sos manes pasaron cientos y cientos de perros, caún con una hestoria, y eso marca pa siempre:
«Pa dedicase a esto nun ye abondo con que te presten los animales y que quieras regalayos el to tiempu llibre: tamién fai falta tener un callu especial, una coraza dura. Si non, pues acabar afondáu», remarca, almitiendo que muncha xente entama con ilusión y dura bien pocu. «A vegaes ye difícil caltenese positivu, pero hai que intentalo. Tamién ye importante la paciencia: equí nada pasa d’un día pa otru. Y hai que saber que siempres, y anque les coses tán camudando, por una adopción que consigues entren dos casos nuevos y toca volver entamar; esto nun ye un esprint, sinón más bien una carrera de fondu», señala.
Tamos n’Animales de Oriente, una protectora d’animales con sede en Piloña que –dende va más d’una década– dedícase a recoyer y cuidar a los animales errantes (perros y gatos principalmente) que paecen nel conceyu y que naide reclama: perdíos, abandonaos, maltrataos, decomisaos… Toos ellos acaben equí, nun recintu llantau en mediu’l monte, y son cuidaos con xeitu pola fuerte rede de voluntarios que formen esta entidá, mientres esperen una oportunidá, un güelpe de suerte, una familia o un milagru.
«Hay munchos, como Bella, qu’anque sían perros fenomenales yá sabemos que lo tienen difícil: son animales yá vieyos, de races grandes, con traumes fondos… Vese cómo pasa’l tiempu y naide se fixa n’ellos nin pregunta por ellos… Esti termina siendo’l so llar. Nós intentamos da-yos tou lo que necesiten pero, sobremanera, intentamos que se sientan queríos, importantes y parte de la familia. A munchos cúesta-yos quitar el mieu o la murniera d’enriba: hai que tener paciencia y nun perder nunca la esperanza nin la ilusión. Hai que trabayar y venir tolos díes pa que sientan que tán seguros. Hai que ser constantes y pensar que esta llabor nun s’acaba nunca…», remarca.
Asina ye: el colectivu de voluntarios que –como Pedro, Mari y Carlos– formen esta proteutora nun tien vacaciones y, amás, acumula delles especialidaes: nun solu reparten comida, llaven, peinen, paseen o dan amor y melicines, tamién faen de psicólogos caninos, de cases d’acoyida, ideen iniciatives pa fomentar l’adopción, salen de casa a cualquier hora p’atender avisos, acompañen al veterinariu, realicen cures, dan bibis… Y, inclusive, encárguense de facer un escrupulosu siguimientu de les persones interesaes n’adoptar a dalgún de los perros.
«La parte de los cuidaos del voluntariáu y cases d’acoyida ye fundamental, pero otru pilar importante ye fomentar que la xente adopte. Y cuandu dalguién s’empobina a facelo, ponemos muncho curiau en conocelos pa saber cuál de los perros s’afaya meyor a les sos rutines, casa, forma de vida… Ye un procesu que nun ye inmediatu: hai que conocer l’animal y qu’él te conoza a ti. Hai que respetar los tiempos… Y una vegada s’acaba, siempres facemos un siguimientu pa saber si too va bien: nun se trata de ser pesaos (anque munches vegaes interprétese asina), sinón de garantizar que cada perru que sal d’equí nun vuelva entrar nunca nun sitiu como esti», cuenta, poniéndose ya de pies.
El tiempu de descansu terminó: Mari y Carlos yá tienen casi too’l trabayu fechu, pero entá queda sacar la basura y dir al veterinariu. Chispa (un mestizu de Bull Terrier de 7 años casi ciega) tien que dir a quitase unos puntos y a Dólar (un cruce de pastor alemán que yá lleva dos años nel recintu) tóca-y revisión por una torsión d’estómagu que sufrió va pocu:
«Un de los voluntarios notólu raru y llevólu a consulta: tuvieron que operalu d’urxencia. Si naide hubiera venío pela mañana, nun se salvaría. Por eso ye tan importante contar con munchos voluntarios: cuantos más seamos, más tiempu podemos pasar equí», diz, acariciando con ciñu a l’animal del que fala, que paez entender les sos palabres y asentir en silenciu.
Pero Animales de Oriente nun solu necesita voluntarios, como’l que salvó la vida a Dólar, como Mari, Carlos y Pedro o como tolos que vienen equí cada día; tamién abren les puertes los fines de selmana pa que cualquier persona sensibilizada cola causa o que tea pensando en adoptar pueda acercase y sacar a pasear a dalgún (o dellos) de los perros pola zona.
«La xornada de puertes abiertes ye una manera de que cualquier persona, tea interesada n’adoptar o non, venga a conocer a los perros: families con neños, xente que se plantega adoptar y quiera conocenos, o simplemente, persones que tengan ganes de dar un paseu bien acompañaos».
Amás, tamién faen falta cases d’acoyía, donaciones de piensu, llates, mantes, tresportines, correes, melicines, xuguetes… Cualquier tipu d’ayuda ye bien recibida (y aprovechada) nesti llugar que –calculen– supón gastos d’hasta 30.000 euros l’añu.
«Funcionamos con un sistema de socios, cola collaboración del Conceyu, ayudes, donaciones… Nel veterinariu faennos un descuentu especial, vendemos llotería, calendarios, faemos una romería añal nel prau de la Cueva… Y asina vamos sufragando esta llocura como podemos», cuenten sorriendo; anque la so sorrisa tenga un toque tristón y reflexe esa impotencia de saber que –por desgracia– nin too l’oru del mundu sería tan valiosu como algamar lo que de verdá persiguen: visibilizar y acabar col abandonu d’animales, una llaceria social que l’añu pasáu afeutó (namás en España) a más de 170.500 perros.
«Aunque les cifres sigan siendo altes, y equí vémoslo tolos díes, dalgo vamos meyorando: el primer añu llegamos a tener ochenta perros custodiaos y agora mesmu tenemos alredor de trenta, contando los que tán en cases d’acoyida. Tamién creo que ye una llabor de futuru y d’educación: nun se trata de pelear nin de polemizar pa camudar la mentalidá d’un paisanu de pueblu, sinón d’educar a les xeneraciones que vienen detrás pa que esto, de verdá, acabe», argumenta Pedro convencíu.
Yá casi son les doce y media y hai que siguir trabayando: como últimu apunte, los tres declaren que, anque s’atopen con casos bien duros que te faen perder la fe na humanidá, les adopciones y los finales felices equilibren la balanza y faen que «reconcíliense» col xéneru humanu. Y si tienen qu’escoyer, prefieren quedar con eso: col montón d’adopciones felices que xestionaron dende l’añu 2008 y col amor (únicu, incondicional, sinceru y agradecíu) que-yos dan tolos animales a los que ayuden.
Ye mediudía, plenu mes de xunetu y sigue lloviendo a mares: Dólar, Mari, Carlos y Chispa van al veterinariu, mientres que Pedro queda, arrancando dalgunos minutos más del so tiempu personal pa nun dexar el recintu solu: despídenos arrodiáu de tres cachorros de pastor alemán que-y esguilen y llámben como’l bon amigu que ye. Ellos entá nun saben cómo furrula’l mundu. Nun tienen impresu na mirada la murniera y baruyu que tantu abonda nesti llugar y que toes les persones que faen Animales de Oriente encárguense de paliar a base de voluntá, ciñu, tiempu, constancia y paciencia.
Pa conocer más de cerca too lo que pasa n’Animales de Oriente, pues siguilos nes redes sociales: ellí cuenten la so realidá día tres día.
Tamién pues escribi-yos pa enterate de cómo echar un gavitu.
Y si nun pues adoptar, collaborar, facer una donación nin ser casa d’acoyida, quiciabes pues compartir les sos publicaciones (o inclusive esti artículu): puede qu’asina daquién más conoza’l so llabor o s’interése por dalgún de los más de venti perros que esperen una familia que los quiera pa siempre.
