Fenómenu bandina

Esta hestoria entama nuna plaza; una d’eses redondes, non muy grandes, con suelu empedráu y una fonte na esquina. 

Ye un pueblu pequeñu. Farolinos y banderes adornen la escena, de fiesta: una sobremesa animada llena  xente esparcía en grupos, falando allegres. Hai guah.es corriendo, tirando petardos nes cais d’al llau; muyeres mayores, pandilles, homes xugando a les cartes baxo una sombriella… 

De sópitu, fáise la música: vien de los caleyones y aporta ensin avisar na plaza, executada por una pequeña banda de músicos bien compuestos que lleguen baillando. Tráen curdión, una gaita, tambor, un bombu… vienen tocando un tema candente: ún d’esos que se repite na radio y que too’l mundu conoz. 

Y entós, la escena xira: la fiesta entama a vibrar distinto. Too’l mundu bailla, o mueve los pies o aplaude; toos y toes sorríen, atentos a la melodía y a los bailles de los músicos. Toos entonen al unísonu los estribillos… llegó una bandina y la fiesta ponse contenta. 

Esta anécdota, que bien podría haber asocedíu a entamos del sieglu pasáu, en realidá asocedió va unos díes, mientres les fiestes de San Xuan, n’ún de tantos pueblos asturianos. Nun importa cuál, porque, en realidá, probablemente pasó en dellos: anguaño, decenes de bandines tán en plena actividá na escena musical asturiana. Más que nunca. 

Y anque nun pueda dicise que’l ‘fenómenu Bandina’ seya un inventu nuevu, sí que pue afirmase que ta viviendo un revival. Y que, queriendo ufiertar música en direutu, animación y son de fiesta, difunden cultura, tradición, respetu, sencillez, unión, memoria… munches de les bones coses que faen d’Asturies un llugar especial. 

Pero, ¿qué ye exactamente una bandina y qué la fai distinta? 

Anque nun esista una definición reglada, siéntese que tien de ser un grupu musical pequeñu, con menos de media docena de persones: nun usen amplificación, toquen a ras de suelu y van bien armaos con instrumentos tradicionales. 

Eso sí, anque lleven la tradición por bandera, otra carauterística común ye que nun se llimiten al repertoriu tradicional o folk: una bandina ye versátil, folixera, y lo mesmo te fai sonar un pasudoble o una canción tradicional asturiana qu’un tema de Shakira o La Lambada. Depende de la xente que los arrodia o del llugar onde tean. Adáptense, mézclense cola xente de la fiesta y ufierten, ensin muncho adornu, música en direutu y cercana. Ehí ta gran parte del so ésitu. 

«Antiguamente, cuando entamaron a surdir bandines n’Asturies, facíase exactamente lo mesmo: tocaben temes tradicionales y adaptaben temes populares, facíen arreglos… Daquella -a principios del s.XX, finales del XIX- formábense porque nun había otra cosa: nin DJs, nin altavoces, nin grupos grandes… había mozos que sabíen tocar instrumentos. Munchos aprendíen nel serviciu militar, nuna banda. Y cuando tornaben a Asturies, p’animar la folixa, xuntábense y tocaben», esplica Indalecio, de la bandina La Xarangana. 

«Cuando entamó a resurdir n’Asturies el tema bandina, fai unos diez años, la hestoria nun yera tan versátil como agora. En realidá, yo diría que la puerta pa versionar cancios abriéronla Los Gascones: acuérdome d’un videu que se fixo viral d’ellos, nel que salíen tocando, con instrumentos tradicionales, ‘Dolores’ de Los Suaves. Triunfaron. Y abrieron un camín a tolos que vinimos detrás», reflexona Serxu, de la bandina Los Muiles, una de les formaciones más recientes d’Asturies. 

Efectivamente, Guillo (de Los Gascones) confirmalo: «En xineru de 2016 creamos la Bandina Los Gascones a raíz d’una propuesta de la Asociación de Sidreríes de la cai Gascona pa interpretar música asturiana y dinamizar la tarde/nueche de los vienres. Decidimos crear un grupu compactu y versátil de cinco músicos con esperiencia na música tradicional asturiana. Pa poder facer más atractiva la nuesa propuesta y acercar la música tradicional a un públicu más diversu, incluyimos nel nuesu repertoriu adaptaciones de temes bien conocíos del pop, el rock y de tola música popular d’ayeri y güei… y esa idea (salvando les distancies) foi como dar cola fórmula de la Coca-Cola», recuerda. 

El casu ye que, a partir d’aquella iniciativa, el fenómenu bandina entamó a crecer y a «ponese de moda» otra vegada. Y que, anque la so fórmula seya la mesma que se usaba hai como cien años, nun ta caduca nin precisa más adornaos nin modernidaes: cuatro músicos (o cinco, o tres…), instrumentos ensin enchufes, nada d’altavoces (nin d’autotunes) nin tampoco escenariu; pero, eso sí, mui bon humor, baille, complicidá, apertura, cercanía… Una bandina tien qu’estar mesturada ente la xente; una bandina conecta, fundese cola folixa, consigue que toos (grandes, pequeños, mozos y vieyos) canten, bailen y participen del espectáculu. Asina ye como consiguen dexar la so fonda güella.

«Nel nuestru segundu añu como formación llegamos a facer más de 150 actuaciones. Nun solo n’Asturies, tamién fuera, tanto en festivales, fiestes, cellebraciones privaes… eso foi una señal bien clara de que la fórmula funcionaba y, amás, yera esportable; foi un prestu ver que daqué tan cenciellu como una propuesta divertida, con música a pie de cai, tenía una acoyida estupenda. Que con daqué tan universal como’l son de folixa se podía esparder, amás, la tradición musical asturiana», sigue contando Guillo.

«Claro, una orquesta o un grupu musical suele tener un repertoriu zarrau, coreografíes, espectáculu de lluz, altavoces, efeutos especiales… Una bandina va con instrumentos al aire, ta metida ente la xente y tien la capacidá d’adaptar el so repertoriu al públicu… Ye daqué muncho más cenciellu y fechu con menos coses. Ye un ‘menos ye más’. Daqué diferente que xune», esplica Indalecio. 

Y ye que, en realidá, equí ta la clave: nel siempre máxicu y eficaz ‘menos ye más’. Por eso, bien podría dicise qu’una bandina ye como una comida de güela: daqué bien prestosu, con un sabor ensin igual, fechu con coses cencielles, de les de siempre, de les de casa… Daqué cercanu y afayadizu que xenera bona sensación. Daqué que, magar ser más humilde, nun camudaríes por un platu de restorán con premiu. Daqué que, con bien pocu, nutre bien fondu. 

Pero, amás, una bandina tresmite cultura. Otra vegada, igual qu’una güela que te convida comer y fálate de la güerta, del respetu, de recetes, de la to hestoria… una bandina convida a baillar y cantar ente que te fala de tradición, de música, d’Hestoria, de vecindá, d’instrumentos, d’emoción, de memoria, de cenciellez y de cantares. 

A la postre, sobre too, una bandina fala d’Asturies. Que –igual que pasa coles güeles– tien muncho que contar, muncho que la fai especial, cosíu de coses pequeñes. Por eso, el ‘fenómenu bandina’ nun solo se tien de ver como un complementu perfectu pa una folixa, sinón que tien de ser cuidáu (y escucháu) como daqué esencial, allegre y enllenu lleiciones; como un abaloriu más d’esa corona que ye la cultura asturiana.